O vento non acompañou na segunda xornada do Campeonato Galego de Wingfoil 2026, celebrado nas augas de Portosín, o que obrigou a anular varias saídas e impediu disputar novas mangas.
As tres probas celebradas o sábado resultaron decisivas. Deste xeito, mantivéronse os resultados iniciais e o título foi para Nicolás Blanco, do Club Náutico Castrelo de Miño. O segundo posto foi para Iván Álvarez, do Liméns W.S.C., a só un punto do ouro, mentres que o bronce foi para Fabio González, do Real Club Náutico Rodeira de Cangas.
O fin de semana tamén estivo marcado pola actividade de vela lixeira, coa participación de diversas clases.
Na Optimist, a vitoria foi para a local Helena Gómez, mentres que en ILCA 4 gañou Diego Fernández e en ILCA 6 impúxose José Manuel Ons, todos eles do Real Club Náutico de Portosín. En 420, o triunfo foi para a parella formada por Magdalena Méndez e Manela Penalta.
Na modalidade de vela adaptada Hansa, o primeiro posto foi tamén para a tripulación patroneada por Manela Penalta, seguida por Candela Asensio e Magdalena Méndez.
A entrega de premios celebrouse nas instalacións do Real Club Náutico de Portosín, coa presenza de representantes do club, da Real Federación Galega de Vela e do Concello de Porto do Son, que destacaron o éxito organizativo e deportivo da fin de semana.
