Tres furgóns da Policía Nacional e media ducia de coches podían verse onte á mañá diante dunha vivenda na parroquia de Queiruga, en Porto do Son. Un amplo dispositivo coordinado dende Madrid e formado por axentes do Grupo Operativo de Intervencións Técnicas (Goit), da capital de España e da Coruña estiveron rexistrando esta localización, onde tamén detiveron a un home de mediana idade coñecido como o Catalán. Presuntamente actuaba como chamán e atendía na súa casa a persoas ofrecéndolles asistencia como vidente ou practicando rituais nos que sacrificaba animais. Ademais esta actuación podería estar tamén vencellada pola presunta comisión dun delito de estafa.
