Turismo de Galicia ven de conceder subvencións a sete concellos das comarcas do Barbanza e Muros e Noia –A Pobra do Caramiñal, Boiro, Rianxo, Ribeira, Muros, Carnota e Porto do Son– para o fomento da accesibilidade dos recursos turísticos no medio rural. O obxectivo das axudas, cofinanciadas co Fondo Europeo Agrícola de Desenvolvemento Rural (FEADER), é dotar aos municipios das infraestruturas e da sinalización adecuadas para facilitar o acceso aos recursos turísticos. O investimento total para estas comarcas é de 137.609 euros.
Esta liña de axudas impulsará a mellora tanto da accesibilidade física como da sinalización de espazos naturais, miradoiros e rutas de sendeirismo, praias marítimas e fluviais, e Bens de Interese Cultural. Deste xeito, os concellos beneficiarios poderán levar a cabo a construción, ampliación ou mellora de aparcamentos para o acceso aos recursos turísticos; a pavimentación dos accesos ao recurso; a construción de pasarelas, ramplas e a eliminación de barreiras arquitectónicas; a construción, rehabilitación ou mellora das instalacións que contribúan a mellorar os accesos e a circulación dos visitantes; a dotación de equipamentos ás diferentes instalacións; a rehabilitación ou mellora dos espazos naturais e a súa dotación de equipamentos, así como a sinalización e a información visual ou táctil.