O conxunto de José Tizón atopou serias dificultades para xerar a súa fluidez habitual durante os primeiros 45 minutos, fronte a un Viveiro ben plantado nun bloque medio que apertou e dificultou as chegadas ás áreas no campo de Barraña.
Tralo paso por vestiarios, a entrada de Cambón e Óscar en punta xunto co movemento de Prol e Insua ás bandas serviu para romper a defensa visitante, acadando o único tanto do encontro tras un pase filtrado de Cambón que Insua definiu con frialdade no man a man.
Nos minutos finais, a expulsión do gardameta do Viveiro tras derrubar a Peque provocou que un xogador de campo tivese que poñerse baixo os paus ao ter os cambios esgotados, detendo o lanzamento de penalti executado por Cambón e mantendo o definitivo 1-0 no marcador.
Un triunfo para o CD Boiro en Barraña que lle permite asentarse na cabeza da clasificación con confianza de cara aos vindeiros compromisos ligueiros.
