Comeza unha nova tempada e con ela, novos retos para a EFM Concello de Boiro. O conxunto feminino inicia o seu segundo curso en Terceira Federación este sábado, 12 de setembro, no campo do P.M. Friol despois de rematar a pasada campaña na sétima posición, con 29 puntos.
As boirenses manteñen boa parte do bloque do ano pasado, aínda que tamén hai baixas e novas incorporacións. Un equipo que aposta pola continuidade, pero cun obxectivo claro. Competir na parte alta da clasificación e seguir medrando.
E nunha tempada na que non resulta doado incorporar xogadoras de fóra, a canteira volverá ter un papel fundamental. O filial, creado hai dous anos, continúa sendo unha peza clave para formar futbolistas e facilitar o seu salto ao primeiro equipo.
A EFM Concello de Boiro busca comezar con bo pé unha tempada na que o obxectivo é claro: dar un paso adiante e pelexar polos postos altos.
