O Auditorio Municipal de Ribeira viviu este sábado un acto moi emotivo. O CIFP Coroso celebrou os seus 50 anos de historia e formación facendo un recoñecemento ás persoas que pasaron polo centro e deixaron a súa pegada. Os sentimentos estiveron a flor de pel e as bágoas fixeron acto de presenza nesta gala na que se conmemorou o nacemento da escola de Formación Profesional de referencia no Barbanza. Comezou a súa andadura no curso 1975/1976 no Mercado Municipal e agora celebrou por todo o alto cinco décadas de formación, velada á que asistiron máis de 400 persoas.
