A FILÓLOGA POBRENSE ANA BOULLÓN INGRESA COMO MEMBRO DE NÚMERO DA REAL ACADEMIA GALEGA NUNHA CERIMONIA QUE TIVO LUGAR NA POBRA DO CARAMIÑAL

Que hai no nome dunha persoa, nun apelido, no nome dun lugar? Que nos din de nós como persoas e como sociedade e que legado nos transmiten estas palabras? A filóloga Ana Boullón ingresou na Real Academia Galega cun discurso centrado en dar resposta a estas e outras preguntas arredor da onomástica baixo o título Todos os nomes: identidade, pobo, país. A profesora da Universidade de Santiago de Compostela, profundou na vertente lingüística e mais na dimensión social de nomes, apelidos e topónimos nun acto que se desenvolveu no Teatro Cine Elma da súa localidade natal, A Pobra do Caramiñal.