GALICIA SEGUE A REDUCIR OS NIVEIS DE PARO EN AGOSTO. A COMARCA DO BARBANZA REXISTROU UN NOVO DESCENSO, POLA CONTRA EN MUROS-NOIA PRODUCIUSE UN LIXEIRO AUMENTO

O paro cae en Galicia por oitavo mes consecutivo. Os datos correspondentes ao mes de agosto evidencian que Galicia continúa a resistir á covid-19. Hai preto de 15.000 parados menos rexistrados respecto de febreiro de 2020, o mes anterior á irrupción da pandemia, e acada un descenso do desemprego respecto a agosto de 2020 nunca visto desde que existen datos, segundo precisa a directora xeral de Formación e Colocación, Zeltia Lado. A comunidade creou emprego ao elevar as afiliacións o mes pasado e rexistra os mellores niveis de paro desde agosto de 2008. O paro baixou nas catro provincias e sete grandes cidades, nas mulleres, nos menores de 30 e maiores de 44 anos e nos principais sectores económicos.