O responsable do Goberno galego, Alberto Núñez Feijóo, garantiu hoxe o compromiso co sector agroalimentario reflectido na Lei de recuperación da terra agraria e na Estratexia do lácteo. Durante unha visita ás instalacións da fábrica de Clesa, Feijóo subliñou que a nova lei facilita unha caixa de ferramentas para mobilizar terras abandonadas ou en desuso, con instrumentos como as aldeas modelo, os polígonos agroforestais ou as agrupacións de xestión conxunta. Engadiu que a Xunta está a constatar a gran demanda de base territorial que teñen os gandeiros galegos.
