A Consellería de Traballo e Benestar destinará ás comarcas do Barbanza e da Ría de Noia un total de arredor de 350.000 euros para desenvolver dous obradoiros de emprego, que poderán beneficiar a 40 persoas sen emprego.
En primeiro lugar, os concellos de Ribeira e Porto do Son desenvolverán de xeito conxunto a iniciativa denominada “Tahume II”, mentres que o concello de Outes levará a cabo o obradoiro titulado “Outes rural”. Contarán con 21 e 19 participantes, respectivamente.
Estas dúas actuacións, ademais de promover a colaboración entre os concellos, apostan pola eficiencia e a optimización do investimento público e ofrecen aos seus participantes unha formación de calidade, xa que os alumnos, unha vez rematados os obradoiros, reciben un certificado de profesionalidade de validez para todo o territorio nacional.
