Era unha das xornadas grandes das festas do Porto do Son, pero a chuvia obrigou a cambiar os plans e cancelar a actividade de maior expectación: a procesión marítima. Pero iso non impediu que decenas de devotos desfrutasen da celebración.
A Virxe do Carme saía da capela da Atalaia acompañada por veciños e autoridades para presidir a misa solemne na explanada portuaria.
A chuvia fixo acto de presenza na recta final da misa, momento no que se decidiu non realizar a procesión marítima. Algo que deixou en terra as embarcacións que tiñan previsto acompañar a patroa dos mariñeiros polo litoral sonense.
Tampouco puido realizarse a tradicional ofrenda floral ao mar. Estaba previsto lanzar unha coroa en memoria de Maricarmen Lema Pouso, a percebeira de Caamaño que faleceu o pasado mes de abril tras ser sorprendida por un golpe de mar mentres traballaba nas pedras de Baroña.
Finalmente, a Virxe do Carme regresou á capela da Atalaia, pechando un acto relixioso que moitos califican de precioso e espectacular.
