A praia de río Azor, en Ribeira, foi o escenario escollido para vivir un novo Campionato Infantil de Cazafoto. O sábado o areal encheuse de amantes desta disciplina que gozaron dunha xornada inesquecible, da man do Club Subacuático Sotavento, organizador, en colaboración coa Federación Galega de Actividades Subacuáticas.
O día acompañou, o sol fixo acto de presenza e as condicións do mar eran as ideais para mergullarse e capturar imaxes da biodiversidade que hai no lugar. Os participantes, de entre catro e 16 anos, tiveron que fotografar a pulmón o maior número de especies de peixe posible no que duraba a proba. E os resultados foron moi destacados.
Os xuíces fixeron unha valoración das imaxes e no proceso identificaron ás especies fotografadas para determinar quen conseguiría cada trofeo. No apartado feminino o primeiro posto foi para Marta, que conseguiu inmortalizar 21 especies. O segundo lugar ocupouno Eire, con 11 especies capturadas. E pechou o podio Mara, con nove.
Na categoría masculina Simón foi o que máis imaxes sacou, un total de 20 especies retratadas. Pablo, con 16, foi o segundo mentres que José Manuel completou o podio con 14. Os dous primeiros clasificados de ambas categorías son de Ribeira e do Club Sotavento, amosando o nivel que hai no municipio neste apartado.
Todos os participantes nesta quinta edición recibiron material de Cressi.