Os locais de Lesende e Vilacova convertéronse este martes en novos puntos de apoio á candidatura de Zernadas de Castro ás Letras Galegas 2027. A iniciativa forma parte do proxecto Zernadas’27, impulsado polo Concello de Lousame para reivindicar a figura e a obra do escritor e relixioso de Fruíme.
Durante os actos, o alcalde de Lousame, Esteban Ares, destacou o respaldo veciñal que está a recibir esta proposta en todas as parroquias do municipio. O rexedor lembrou especialmente o acto celebrado o pasado 17 de maio en Fruíme, no que participaron centos de persoas reclamando o recoñecemento da Real Academia Galega para Zernadas de Castro.
