A Garda Civil de Boiro vén de deter a tres homes e unha muller como presuntos autores de varios delitos contra o patrimonio no marco da operación Larpeiros. A investigación comezou xa o pasado verán, por mor do incremento de roubos nos termos municipais de Boiro e A Pobra.
O modus operandi dos detidos consistía na vixiancia de posibles obxectivos para despois acceder ao lugar en horario nocturno, sen importarlles causar desperfectos para obter o seu obxectivo. Para transportar os efectos roubados empregaban remolques previamente substraídos.
Logo de investigar a información recollida, en parte grazas á colaboración cidadá, os axentes lograron a identificación dos individuos, resultando ser tres varóns e unha muller, todos eles veciños de Boiro. Estímase que o valor dos artigos roubados e os danos causados ronda os 80 mil euros.
Unha vez detidas estas catro persoas como presuntas autoras de arios delitos contra o patrimonio e integración en grupo criminal, foron postas a disposición do Xulgado de Instrución de Ribeira, que decretou o ingreso en prisión de dúas delas.