NÉSTOR REGO PEDIU O APOIO DOS BOIRENSES PARA SEGUIR DEFENDENDO OS INTERESES DOS GALEGOS NO CONGRESO E PODER FORMAR UN GRUPO FORTE DO BNG EN MADRID

A campaña electoral chega ao seu final. Mañá é a xornada de reflexión e o domingo as mesas electorais estarán abertas para que os cidadáns poidan exercer o seu voto. Pero antes os partidos aproveitaron as últimas horas para seguir buscando o apoio dos votantes. O BNG, encabezado polo seu candidato ao Congreso, Néstor Rego, mantivo onte un encontro coa veciñanza de Boiro onde afirmou que o grupo nacionalista é o único que garantirá a defensa de Galicia en Madrid á vez que servirá de barreira contra a dereita e a ultradereita.