A visita, realizada o pasado 5 de setembro, permitiu achegarse a unha colección de arredor de 70 gravados realizados por Quessada nos anos 70. Un proxecto ambicioso que percorre a historia de Galicia desde a prehistoria ata a ditadura franquista.
Dólmenes, petroglifos, celtas, romanización, a invasión napoleónica, a República, a Guerra Civil ou a resistencia ao franquismo aparecen reinterpretados a través do particular universo expresionista do artista.
A serie permaneceu dispersa durante décadas e nunca chegara a exhibirse na orde concibida polo propio Quessada. A investigación e o traballo de recuperación impulsados polo comisario permitiron localizar, restaurar e ordenar de novo as planchas orixinais.
