A Cidade do Fútbol das Rozas acolleu o duelo dos cuartos de final do Campionato de España sub19 de clubs no que se enfrontaron o Jimbee Cartagena e o Noia Portus Apostoli xuvenil. Os noieses chegaban a esta cita coa intención de conseguir a clasificación para as semifinais e seguir facendo historia cunha xeración irrepetible. Pero os pupilos de Pablo Cardoso non atoparon o camiño ao gol e os cartaxineses leváronse o triunfo por 2-0.
O duelo estivo moi equilibrado, tanto que ningún dos dous equipos foi quen de poñerse por diante na primeira metade. E iso que houbo ocasións. Os noieses gozaron dalgunhas con moito perigo, sobre todo ao final do primeiro tempo, pero a falta de puntería, a defensa rival ou o meta impediron que puideran abrir o marcador.
Arrancou a segunda metade con máis chegadas brancas e unha presión alta que provocou erros no Cartagena, pero o Noia non puido aproveitalos. O Jimbee conseguiu poñerse por diante cando faltaban 8 minutos e 13 segundos para o final. Cris evitou o gol de primeiras mando o esférico a córner, pero a defensa branca non se pechou ben e Dani Ruano non perdoou.
Os brancos buscaron sen éxito o empate, apostando polo porteiro xogador. Pero unha perda no centro do campo a falta de 2 minutos para o final converteuse no 2-0 en favor do Cartagena. Diferenza que os brancos non puideron igualar a pesar de xerar ocasións para acurtar distancias.
O Noia Portus Apostoli pecha unha gran temporada con este encontro que é o final dunha gran xeración noiesa.
