O conselleiro de Presidencia Diego Calvo visitou esta mañá as instalacións de Actemsa no polígono da Tomana, na Pobra do Caramiñal. A empresa, dedicada principalmente á importación e exportación de peixe conxelado e ao proceso de túnidos e servizos de conxelación, leva activa dende o 1994 e conta con 250 empregados directos e outros 400 indirectos.
Diego Calvo percorreu a factoría co equipo directivo de Actemsa e o seu fundador e presidente honorífico, Severino Escurís, e puido comprobar os procesos e os plans futuros da compañía. Durante a visita, o conselleiro agradeceu a invitación e puxo en valor o potencial da industria galega de transformación de produtos do mar, da que forma parte esta empresa. Tamén trasladou o apoio do Goberno galego a este sector clave na economía de Galicia.