A pesar da vontade da xuíza instrutora da operación Pokémon de pechar antes de que acabe o ano todas as dilixencias en marcha, que xa afectan a case 130 imputados, onte ditou un novo auto no que reclama ao PSOE de Ribeira, toda a documentación relativa ás súas contas bancarias no período comprendido entre maio e xullo do 2011.
A xuíza De Lara xustifica a súa nova providencia porque na documentación solicitada en primeira instancia, como ocorreu nos casos do PP e o BNG, non se achou pegada algún dos pagamentos que supostamente tería realizado o delegado do grupo Vendex en Galicia, José María Titor, por unha contía global de algo máis de 47.000 euros.
A instrutora da operación Pokémon afirma na súa providencia de onte que «da documental recibida a petición deste xulgado, obsérvase que as supostas cantidades de diñeiro entregadas por José María Titor a distintas persoas relacionadas co PSOE e que son obxecto da presente investigación, non se atopan reflectidas na documentación oficial contable e/ou bancaria achegada polas distintas sedes dos devanditos partidos».
Así, aínda que os pagamentos dos que fala a xuíza por mor dos informes presentados por Vixilancia Aduaneira non foron aínda acreditados de forma fidedigna, De Lara espera que pode aparecer algún novo rastro da revisión dos movementos bancarios do PSOE.
En Ribeira solicita á Caixa a documentación relativa ás imposicións en efectivo efectuadas nunha conta desa entidade bancaria cuxo titular é a agrupación local do partido do puño e a rosa.
No seu escrito, a xuíza Pilar de Lara vincula todas as pescudas a realizar sobre os movementos bancarios no marco da comisión dun posible delito de tráfico de influencias.
