As festas de Santa Uxía deron fin no día de onte ao son da Coral Polifónica Municipal de Ribeira, que cantou na Igrexa Parroquial, dirixida por Enrique Paisal e coa posterior procesión coa virxe.
Non en balde, tratouse da edición máis animada de Santa Uxía. O venres a última hora, unha das protagonistas da velada foi A Rosa. A mítica formación folk levou ao Dique as súas pezas populares galegas e arrincou a euforia do respectable. Talvez para darlle un toque máis íntimo aos concertos, como xa sucedera ao mediodía coa sesión vermú, os grupos actuaron nun pequeno escenario, moi preto do público, o que invitaba a contaxiarse do que se facía sobre a palestra e bailar e cantar.
O sábado, novamente, houbo festa todo o día. Cada pouco tempo, e estivese un na rúa de Santa Uxía que estivese, podía oír melodías de fondo grazas á ampla programación musical.
Pero, sen ningunha dúbida, o que máis triunfou ao longo das celebracións foi o arte local. O festival de baile da Asociación Cultural Alfaia do sábado tivo un cheo rotundo no auditorio, tomado en gran parte por pais e nais desexosos de ver danzar aos seus fillos.
