A praia de Coira será este sábado o escenario dunha nova travesía a nado. Organizada polo Concello de Porto do Son, trátase dunha cita cunha longa traxectoria e que se foi asentando no calendario de actividades estivais ao longo dos anos.
A cita arrancará ás 11:30 da mañá, mais os participantes deben recoller os dorsais a partir das 09:30. Dita proba consta de tres percorridos. O primeiro consta de 200 metros e vai destinado aos máis cativos; o segundo é de 1.250 metros para as categorías adolescente e maiores; e, o terceiro, de 2.500 metros destinado á modalidade sénior.
Todos os interesados en participar deben enviar un correo electrónico a deportesdoson@gmail.com. Na mensaxe ten que figurar o nome e apelidos, o enderezo, a data de nacemento e o número de D.N.I. O prazo de inscrición remata o 25 de agosto ás 20:00 da tarde. De momento xa hai en torno a 75 participantes, mais esperáse superar a cifra de 100.
Un evento que non sería posible sen a colaboración de Cruz Vermella, Salvamar, Real Club Náutico de Portosín, Protección Civil de Porto do Son e socorristas da piscina municipal.
Por outra banda, o domingo celebraráse a final da «Copa Concello de Porto do Son. VIII Memorial Emilio García». O encontro disputaráse a partir das 19:00 da tarde no campo Emilio García entre os equipos que resulten gañadores nas semifinais.
Neste senso, o concelleiro de Deportes, Manel Deán, anunciou que xa están traballando no almanaque deportivo de cara ao inverno, prestando especial atención ás escolas deportivas e á piscina municipal.
https://www.youtube.com/watch?v=HL8u36ooS3s