O Boiro sumou os tres primeiros puntos da súa historia en Segunda B no partido que se disputou contra o Valladolid no campo anexo ao José Zorrilla. O equipo de Fredi Álvarez foi superior durante os primeiros 70 minutos, mais un erro defensivo a escasos minutos do descanso permitiu que os vallisoletanos anotasen o seu primeiro gol no marcador. A garda boirense formada por Romay e Jorge Cano foi a encargada de anotar os primeiros goles do curso 2016-2017.
O encontro comezou co dominio do equipo barbanzán. As primeiras oportunidades foron para os de Fredi Álvarez, que aliñou no centro do campo a Manu Rodríguez e Borja Yebra. Os boirenses adaptáronse rápido ao terreo de xogo e Jimmy tivo a máis clara ocasión cun disparo que cuspiu o largueiro. A segunda foi para Cano, mais a súa xogada non finalizou en gol por centímetros.
Higinio levouse o balón na súa xogada por banda e, tras colarse na área con facilidade, cedeu a Mito, quen anotou o primeiro gol do equipo vallisoletano. Tras o tanto, o árbitro pitou o final do primeiro tempo.
Pasado o descanso, os boirenses regresaron ao céspede dispostos a darlle a volta ao encontro. Cunha intensidade similar á dos primeiros 45 minutos, o equipo de Fredi Álvarez fíxose dono do balón e as oportunidades remataron en gol. Romay encargouse de marcar o primeiro tanto no minuto 56 lanzando o disparo dende a beira da área. Dez minutos máis tarde, Jorge Cano deulle a volta ao marcador cun disparo seco.
Co partido de cara, o Valladolid B viuse obrigado a adiantar liñas co obxectivo de vencer ao Boiro, mais a súa táctica non tivo éxito. Ao escoitar os tres pitidos finais, os boirenses celebraron os primeiros puntos da tempada.
https://www.youtube.com/watch?v=lRVH7k2G_tA
