Cabo de Cruz acollerá unha nova edición da Exaltación do Mexillón de Galicia por décimo quinto ano consecutivo. Dito evento aposta, máis que nunca, por coidar a presentación. De feito, por primeira vez, o molusco servirase nun prato conmemorativo e artesanal realizado por oleiros de Buño.
A cita gastronómica arrancará na noite do sábado 20 de agosto cando, ao redor das 21:00, as racións de paella comecen a invadir as mesas dispostas na explanada do porto crucense. A inauguración da festa adicada á exaltación do mexillón está prevista para o domingo 21 de agosto a partir das 12:30 do día.
Fronte á lonxa de Cabo de Cruz reúnense cada ano centos de comensais co propósito de saborear este molusco da ría de Arousa que prepara o chef Miguel Mosteiro a través de catro receitas. Nesta ocasión, ademais dos mexillóns ao vapor e como recheo de empanadas, ofreceráse tamén unha ensalada a base do molusco con picatostes, aliño e noces, así como un humos de garavanzos e mexillón. Por iso non resulta estraño o feito de que, para a elaboración destes pratos, se necesiten 4.000 quilos do molusco.
O Concello de Boiro organiza esta festa coa colaboración da Deputación e o respaldo da denominación de orixe de Mexillón de Galicia, así como das asociacións locais A Marxa, Amebarraña e Virxe do Carme.
https://www.youtube.com/watch?v=1UXseP5eklw
