Como cada Primeiro de Maio, as rúas enchéronse unha vez máis de traballadores que reclaman unha mellora da súa situación. Nesta ocasión o incremento da inflación e as malas condicións laborais foron as protagonistas nesta marcha que percorreu Ribeira e á que asistiron preto de 150 veciños, membros de sindicatos e agrupacións políticas. A saída da marcha foi diante do mercado, percorreu parte do casco urbano e pasou por O Grupo, o Centenario e chegou á praza do concello, onde se mandaron diferentes mensaxes á Administración galega e ao Goberno central.
