O volume de tráfico de mercadorías nos 122 portos de titularidade autonómica medrou no primeiro semestre do ano un 11% respecto aos datos rexistrados no mesmo período de 2015. Desta información deuse conta esta semana ao Consello de Administración de Portos de Galicia na súa última convocatoria.
En concreto, a cifra movemento de mercadorías entre xaneiro e xuño de 2016 foi de preto de 869.000 toneladas, unha cifra que supón un incremento de preto de 86.000 toneladas en termos netos respecto ao ano anterior.
Nunha análise porto a porto, os peiraos con maior volume de tráfico de mercadorías foron, respectivamente: Ribadeo, con máis de 232.300 toneladas; Cariño, con preto de 207.000 toneladas; e Cee con preto de 185.400 toneladas. Cómpre destacar tamén o caso de Viveiro-Celeiro, que rexistrou nos 6 primeiros meses do ano o movemento de máis de 62.400 toneladas de mercadorías, un 36% máis que o ano anterior.
Respecto á descarga de pesca fresca, nos peiraos dependentes da Xunta de Galicia descargáronse ata o 30 de xuño máis de 46.500 toneladas de peixe. O importe total da venda en lonxa aumentou ata preto dos 122 millóns de euros, un 10,6% máis que no primeiro semestre en 2015. Os peiraos con maior volume de descarga de pesca fresca foron: Ribeira, con máis de 13.200 toneladas; Burela, con máis de 12.100 toneladas, e Celeiro-Viveiro, que superou as 8.500 toneladas.
https://www.youtube.com/watch?v=LxUA8f0sVTE
