A campaña de verán da Dirección Xeral de Xuventude comeza mañá con máis de 9.000 prazas en campamentos, campos de traballo e actividades para maiores de 18 anos. A Consellería de Política Social incrementou por quinto ano consecutivo as prazas para este fin. Esta cifra supón un incremento do 6% con respecto ás prazas ofertadas o ano pasado.
Os campamentos para rapaces e rapazas de entre 9 e 17 anos ofertan 6.205 prazas. Estes celebraranse nos meses de xullo e agosto, nun total de 20 albergues e campamentos de toda a xeografía galega, entre os cales se atopan o Albergue Xuvenil Marina Española (Sada), o Albergue Xuvenil Gandarío (Bergondo), o Campamento Xuvenil Furelos (Melide), o Campamento Xuvenil Virxe de Loreto (Porto do Son), o Campamento Xuvenil A Espiñeira (Boiro), o Albergue Xuvenil Area (Viveiro), o Albergue Xuvenil Benigno Quiroga (Portomarín), o Campamento Xuvenil A Devesa (Ribadeo), o Campamento Xuvenil Os Chacotes (Palas de Rei), o Poboado Os Peares (Carballedo), o Albergue de Quiroga, a Residencia Xuvenil Lug II (Lugo), o Campamento Xuvenil Penedos de Xacinto (Entrimo), o Centro de educación ambiental Equal (Coles), o Albergue do Corgo (Muíños), a Estación de Montaña de Manzaneda, a Residencia Xuvenil Florentino López Cuevillas (Ourense), o Albergue Xuvenil As Sinas (Vilanova de Arousa), o Campamento Xuvenil Pontemaril (Forcarei) e o Campamento Xuvenil Illa de Ons (Bueu). Tamén se ofertan outras 208 prazas para que os mozos e mozas galegos poidan participar en campamentos de intercambio con outras comunidades autónomas, concretamente no País Vasco, Castilla e León, Extremadura, Madrid e La Rioja. Os mozos e mozas desas comunidades tamén poderán vir a Galicia para participar nos nosos campamentos. A duración de cada unha das actividades virá marcada pola idade dos participantes e polas características dos propios campamentos, que oscilan entre os oito e os doce días. Dentro destes campamentos organízanse actividades de ocio educativo de diferentes temáticas.
https://www.youtube.com/watch?v=2DQWyzajpCw
