O Unión de Asados demostrou outra xornada máis que está de volta. Logo de vencer a semana pasada ao Lalín cunha remontada nos últimos minutos, esta xornada fixo o mesmo fronte ao Flavia, pero de forma contundente. Chegaba o líder ao Municipal de Vilas, e nos primeiros 45 minutos xa marchaban por detras do marcador con tres goles de desvantaxe. Na segunda metade os locais continuaron co recital e anotaron os dous tantos que puxeron o definitivo 5-0 e que dan un golpe sobre a mesa. Os goleadores foron Ismael Cerqueiras e Sergio Nieto con sendos dobletes e Néstor Rodríguez.
Noutro partido clave enfrontábanse o Cidade de Ribeira, que chegaba ao Cordeiro como colíder, os de Valga eran terceiros. Un solitario gol de Pedro a pase de Aguado, a falta de cinco minutos para o descanso, serviulles aos de Manuel Ángel e Moreno para levarse os tres puntos e adicarlle o triunfo a José López, O Masaxista, que facía un ano do seu falecemento.
O Taragoña pola súa parte rascou un empate sen goles na súa visita a Praíña, un rival e un campo moi complicado. Os da Lomba volveron a dar mostras de que están feitos para competir nesta categoría, a pesar de non sumar ningunha vitoria en toda a tempada.
No grupo da Costa, o Volantes de Baño venceu ao Belvís por 2-1 con dous goles desde os 11 metros de Pesco. Con este triunfo os de Muros suman dous triunfos consecutivos e póñense sextos con 13 puntos, a 6 da promoción de ascenso.
