Os concellos da comarca do Barbanza recibirán 11 millóns de euros da Deputación provincial para investir en varios proxectos a través do Plan Único 2021. Do total preto de 2 millóns irán destinados a financiar gastos sociais dos municipios para paliar os efectos da pandemia e protexer aos colectivos máis vulnerables.
O presidente provincial, Valentín González Formoso, remarcou a utilidade do programa para mellorar infraestruturas e servizos, dar apoio no eido social e impulsar a reactivación económica dos municipios.
Os concellos do Barbanza executarán un total de 42 obras de humanización de rúas e espazos públicos, mellora de iluminación e saneamento ou renovación de estradas. Destacan investimentos como os 230.900 euros para o proxecto de mellora de infraestruturas hidráulicas en Abelleira (Muros), os 193.300 euros para o saneamento en Mantoño (Porto do Son) ou os 169.000 euros para o punto de atención á infancia no Cruceiro (Outes).
