A cuarta edición do ArousaMan xuntou a 39 nadadores

A cuarta edición do ArousaMan completouse esta fin de semana. A cita solidaria, que naceu no 2005 e celébrase cada dous anos para darlle visibilidade ao dano cerebral adquirido, contou nesta ocasión con 39 participantes. Divididos en tres grupos, o primeiro saíu de O Grove ás nove da mañá, o segundo media hora máis tarde e o último, formado por cinco persoas, fíxoo ás dez. Este ano houbo presenza olímpica, xa que Kimbo Vallejo foi un dos nadadores que percorreu a travesía de 13 quilómetros que separan O Grove de Ribeira.