As descargas de peixe fresco nos peiraos de titularidade autonómica rexistrou un incremento interanual do 11,71% nos primeiros oito meses deste ano. Segundo o último informe de xestión de Portos de Galicia, correspondente ao mes de agosto, as descargas de peixe fresco situáronse en 73.262 toneladas, o que supuxo un valor en primeira venda de máis de 158 millóns de euros e un 8,43% de incremento.
Nunha análise porto a porto, os peiraos que lideran esta actividade no acumulado do exercicio actual son os de Ribeira, con máis de 19 millóns de quilos acumulados nos oito primeiros meses do ano; Burela, cun pouco máis de 17 millóns de quilos; e Celeiro, con máis de 10 millóns de quilos. Cómpre destacar, unha vez máis, o incremento de actividade do peirao de Malpica, que foi o que rexistrou porcentualmente a maior suba respecto ao acumulado no mesmo período de 2014, cun 292,17% máis que no anterior exercicio.
En canto ás principais mercadorías cargadas e descargadas nos peiraos comerciais no mes de agosto, o peirao de Cariño aumenta nun 58,33% as descargas de dunita. No apartado de descargas de túnidos conxelados, na Pobra do Caramiñal prodúcese un incremento do 37,50% nas súas descargas. Namentres, en Burela, a descarga de madeira en bruto mantense practicamente sen movemento neste mesmo período.
