A comarca de Barbanza capitaliza o tráfico de túnidos con 60.000 toneladas na Pobra e 22.500 en Ribeira e subidas do 2 e o 18% respectivamente

O tráfico portuario de mercadorías nos peiraos de titularidade autonómica rexistrou un incremento interanual do 11% ao peche dos primeiros sete meses do ano.
https://www.youtube.com/watch?v=bfAX_4QW6Ag
Segundo o último informe de xestión de Portos de Galicia, correspondente ao mes de xullo, o movemento de mercadorías acumulado nos sete primeiros meses de 2018 situouse en 1.060.000 toneladas, fronte ás 955.000 do pasado ano.
O presidente de Portos de Galicia deu conta destes datos esta mañá nunha visita ao porto da Pobra do Caramiñal, un dos que rexistra maior actividade neste sentido e que se mantén líder ano tras ano no tráfico de túnidos conxelados. Nunha análise porto a porto, os peiraos que lideran a actividade de carga e descarga de mercadorías no acumulado do exercicio actual son os de Cariño, con 343.000 toneladas acumuladas nos sete primeiros meses de ano; Ribadeo, con 291.000 toneladas; e Brens-Cee, con 224.000 toneladas. A este respecto cómpre destacar o incremento de actividade do peirao de Cariño, que rexistrou unha suba do 19% respecto ao acumulado no mesmo período de 2017, o incremento porcentual máis destacado; seguido de Ribeira, que subiu un 18% e Viveiro-Celeiro, cunha suba do 17%.