A Consellería de Cultura e Educación convida a cidadanía a celebrar as principais datas arredor do libro e da lectura co calendario de 2018, que se está a distribuír entre todos os centros da Rede de Bibliotecas Públicas de Galicia e dos establecementos adheridos á Federación de Librarías de Galicia.
O vicepresidente da Federación de libreiros de Galicia, Antón Pedreira, recibiu hoxe un exemplar do cartel de mans do secretario xeral de Cultura, Anxo Lorenzo, que visitou esta mañá a Libraría Pedreira, en Santiago de Compostela. Anxo Lorenzo tamén lle fixo entrega do calendario a Jesús Torres, director da Biblioteca Pública de Santiago Ánxel Casal, centro que en 2018 celebra unha década da súa posta en marcha.
