A brigada municipal de obras do Concello de Riveira iniciou esta mañá unha actuación destinada a construír un novo tramo de beirarrúas de 30 metros de lonxitude na zona de Amarella, na cidade de Santa Uxía, co fin de mellorar a seguridade e a accesibilidade viaria.
Concretamente, a zona de actuación está situada na rúa Arcebispo Xelmírez, a carón da pequena praza enclavada neste barrio, e a intención é conectar a beirarrúa xa existente coa que hai no cruce coa rúa Valle Inclán de tal xeito que os viandantes non teñan que camiñar en ningún momento pola calzada.
