O presidente da Xunta, Alberto Núñez Feijóo, presentou hoxe Galicia ante o grupo CITIC como a mellor opción para seguir ampliando os seus investimentos en Europa.

Durante unha visita ás instalacións do grupo, onde se reuniu co presidente de CITIC HIC, Yu Zhangfa, Feijóo incidiu na competitividade da Comunidade galega como o mellor aval da súa candidatura para que a empresa chinesa desenvolva novos proxectos, novas fábricas e cree novos postos de traballo.
“Tivemos unha longa xornada de traballo que nos ocupou toda a tarde de onte, a cea e o almorzo de hoxe”, subliñou, afirmando que con esta xuntanza se estableceron pontes de confianza entre o que é o primeiro grupo empresarial de China e o Goberno galego.
Feijóo explicou, ademais, que outro dos obxectivos do encontro foi a confirmación da consolidación do investimento de CITIC Censa en Galicia, non en van, o grupo está presente na Comunidade desde que en 2011 adquirira o 100% da empresa Gándara Censa S.A., especializada en caldeirería e situada no Porriño. “O presidente da compañía amosounos o seu compromiso de manter o investimento, de incrementalo e de consolidalo dentro do tecido industrial de Galicia”, aseverou.
O presidente do Goberno galego concluíu a reunión agradecendo a oportunidade de coñecer máis de preto o traballo e os obxectivos desta multinacional con presenza en Galicia e expresou o seu optimismo ante unha decisión que a empresa tomará a finais de ano. “Ímonos optimistas e confiados en que CITIC HIC siga en Galicia e poida ampliar as súas instalacións, os seus investimentos e o seu cadro de persoal na Comunidade. A candidatura de Galicia está xa formalmente presentada e as relacións de confianza entre o grupo e o Goberno galego quedaron concretadas”, explicou, destacando a boa acollida, por parte da empresa, da delegación galega formada polo presidente do Executivo galego e o equipo económico da Xunta.
Con máis de 170.000 empregados, CITIC é actualmente a maior empresa de China e unha das maiores multinacionais do mundo, presente en 53 sectores da economía, desde maquinaria pesada e fundición, ata seguros, inmobiliarias ou saúde.