A conselleira de Política Social e Igualdade, Fabiola García, e o alcalde de Outes, Francisco Calo, asinaron os acordos que permitirán executar as obras nos dous centros.
A maior parte do investimento, máis de 48.000 euros, irá destinada ao centro de día. As actuacións inclúen o pintado das paredes, a instalación de novos pavimentos e a renovación das proteccións das escaleiras.
Non é a primeira intervención neste equipamento. O pasado ano, a Xunta xa financiara obras de mellora no centro de día por un importe de 20.000 euros.
Na escola infantil municipal, o investimento rolda os 13.000 euros. Os traballos realizaranse durante o período non lectivo e centraranse principalmente no acceso exterior ao centro.
A entrada cambiará de localización e tamén se renovará o pavimento, co obxectivo de facer o espazo máis cómodo, seguro e accesible para as familias.
A Xunta destaca que estes investimentos buscan adaptar os equipamentos públicos ás necesidades das familias. O Concello de Outes será o encargado de executar e facer o seguimento das obras nos dous centros.
MÁIS DE 60.000 EUROS PARA MELLORAR DOUS EQUIPAMENTOS SOCIAIS DE OUTES
