Pasar unha tarde de verán na praia tamén pode ser unha oportunidade para dar renda solta á creatividade. Cubos, pas e moita imaxinación foron as ferramentas dos nenos e nenas que participaron na terceira Xuntanza de Esculturas de Area de Aguiño.
Ao longo da tarde, os participantes foron modelando as súas creacións coa axuda das súas familias, convertendo o areal do Porto nun auténtico escaparate de figuras de todo tipo.
Tras valorar a orixinalidade e a elaboración das obras, o xurado premiou tres esculturas: un coche, un dragón e un cabaliño. Tamén houbo recoñecementos para outros participantes pola súa implicación, entre eles dúas avoas de 76 anos que se sumaron á actividade.
A iniciativa volveu apostar por fomentar a convivencia, a creatividade e o desfrute da praia en familia a través dunha actividade xa consolidada no calendario estival de Aguiño.
AGUIÑO CONVERTEUSE ESTA FIN DE SEMANA NUN MUSEO DE ESCULTURAS DE AREA
