A investigación comezou despois de que unha empresa de Valencia ingresase por erro 7.000 euros nunha conta bancaria distinta da do seu provedor habitual. Os estafadores suplantaran a identidade da empresa cun correo electrónico case idéntico ao orixinal e modificaran o número de conta da factura.
A Garda Civil comprobou que o diñeiro foi retirado de inmediato. Ademais, esa mesma conta recibiu outra transferencia procedente doutra empresa e, poucas horas despois, os fondos foron enviados a varias contas no estranxeiro, dúas delas en Romanía, seguindo o modus operandi habitual deste tipo de fraudes.
Segundo os investigadores, os autores tamén empregaron servidores virtuais e servizos na nube para dificultar o seu rastrexo. A muller, veciña de Ribeira, está investigada por presuntos delitos de estafa, falsidade documental e branqueo de capitais. Tras acollerse ao seu dereito a non declarar, foi posta a disposición xudicial.
A investigación foi desenvolvida pola CiberComandancia da Garda Civil, que mantén aberta a análise para esclarecer a posible participación doutras persoas na estafa.
