O fútbol base tomou o protagonismo en Ribeira esta fin de semana. A Fieiteira abriu as súas portas para acoller a décimo novena edición da Copa Sálvora e estes 30 e 31 de maio xogaron 55 equipos que competiron por facerse co trofeo nas categorías biberón, prebenxamín, benxamín e alevín.
O Xuventú Aguiño alzouse coa vitoria na modalidade biberón ao superar na final ao Cacheiras. O Atlético Oleiros finalizou terceiro mentres que o Cidade de Ribeira foi cuarto e o Carreira, quinto. A competición continuou coa disputa do apartado alevín, conquistado polo Villestro ao superar ao Choco. O Compostela quedou terceiro e o Cidade de Ribeira, cuarto. Nesta categoría Simón Álvarez, do Choco, recibiu o Trofeo Alberto Villaverde como mellor porteiro. E Tiago Rodríguez, do Compos, foi designado como o mellor xogador da xornada do sábado.
A categoría prebenxamín colleu a testemuña e o Conxo levouse o triunfo e o título de campión tras superar ao Xuventú Aguiño, subcampión. E o equipo local, o Cidade de Ribeira, coroouse como o mellor benxamín seguido do Cacheiras que conseguiu o subcampionato.
