A Deputación da Coruña destina 7,6 millóns de euros ao Plan de Conservación da rede provincial de estradas

O Boletín Oficial da Provincia publica a licitación do Plan de Conservación de Estradas, que este ano contará cun orzamento de 7,6 millóns de euros, divididos nun total de 37 grupos, para os 93 concellos coruñeses.
A estes 7.635.069 euros do Plan de Conservación hai que sumar os preto de 4 millóns de euros que a Deputación ten xa en proceso de adxudicación para a realización de labores de desbroce nas estradas provinciais no período 2017-2018, que por primeira vez se exclúen do Plan de Conservación e son obxecto dun contrato exclusivo, o que contribuirá a mellorar e axilizar este servizo, que inclúe a limpeza de herbas e maleza de todas as estradas provinciais para facilitar a visibilidade da circulación, evitar a propagación de incendios e mellorar o drenaxe en caso de choiva.