A xuíza do Tribunal de Instancia de Noia, praza n.º 2, decretou o sobresemento definitivo da investigación ao considerar que non existen indicios de delito penal derivados da vertedura de pellets producida tras a caída de seis contenedores ao mar.
Segundo recolle o auto xudicial, a perda da carga produciuse como consecuencia dun forte golpe de mar provocado pola ondada no costado de babor do buque, cumpríndose en todo momento os protocolos de carga por parte da empresa operadora e sen que se detectase ningunha irregularidade na actuación da tripulación.
A decisión baséase, entre outros informes, no elaborado pola Garda Civil a través do Seprona, así como en documentación achegada polo armador, a empresa fretadora, o Instituto Tecnolóxico para o Control do Medio Mariño de Galicia e informes periciais da Fiscalía de Medio Ambiente.
En canto ao impacto ambiental, a xuíza destaca que as análises realizadas aos pellets recollidos nas costas non revelan toxicidade nin concentracións perigosas de substancias, polo que non se prevé un impacto significativo a medio ou longo prazo máis aló do xa existente pola presenza doutros microplásticos no medio mariño.
Por todo isto, o tribunal considera que os feitos non xustifican a intervención da vía penal, aínda que o auto non é firme e pode ser recorrido ante a Audiencia Provincial da Coruña.
O Xulgado de Noia arquiva de forma definitiva a causa polos pellets do Toconao
