Miles de propietarios de vivenda sacaron estes días a calculadora do caixón e puxéronse a facer contas cos seus asesores fiscais e os seus axentes inmobiliarios para tomar canto antes unha decisión que lles pode aforrar miles de euros. E é que, se o trámite parlamentario non modifica o texto aprobado polo Goberno, a reforma tributaria que entrará en vigor o 1 de xaneiro suporá un auténtico machadazo fiscal para os vendedores de vivenda usada, especialmente naqueles inmobles con máis de vinte anos de antigüidade.
A norma dá unha de cal e unha de area. Aínda que rebaixa os tipos aplicables ás plusvalías -que pasan dunha pinza de entre o 21 % (os primeiros 6.000 euros) e o 27 % (a partir dos 24.000) a outra do 20 ao 24 % no 2015,- o efecto desa rebaixa non será suficiente na inmensa maioría das operacións para compensar o machadazo que suporá a eliminación dos coeficientes de abatemento e corrección monetaria. Dous elementos descoñecidos pero claves á hora de determinar a factura fiscal na venda dunha vivenda.
O primeiro permite actualizar o valor de compra dun inmoble aos prezos actuais, corrixindo o efecto inflación para axustar a plusvalía final da operación, sobre a base de que, por pór un exemplo, dez millóns de pesetas do ano 82 non son o mesmo que 60.000 euros na actualidade. Aínda que desde o 1 de xaneiro serán iguais a efectos fiscais. Máis relevante aínda é a eliminación dos coeficientes de abatemento, que supuñan a redución da ganancia patrimonial xerada na venda dun inmoble adquirido antes do 31 de decembro de 1994.
A supresión destes incentivos suporá que un cidadán que comprase un piso por catro millóns de pesetas (24.040 euros) en 1982 e véndao agora por 200.000 euros tería que pagar 11.965 euros polas plusvalías se pecha a operación o 31 de decembro deste ano, pero vería disparada a factura ata os 41.110 (un 244 % máis) se a formaliza só un día máis tarde.
A pesar da súa transcendencia, os cambios na fiscalidade da vivenda pasaron desapercibidos, ocultados polo brillo doutras medidas de máis relumbrón, como a rebaixa dos tipos do IRPF.
http://youtu.be/yPqr1KOKpvk
