Durante os meses de xaneiro e febreiro, a Unión de Consumidores de Galicia (UCGAL) percorreu Galicia cunha campaña informativa que tiña como principal obxectivo achegar información e asesoramento gratuíto ás persoas afectadas polas cláusulas chan e os gastos hipotecarios.
A través destas xornadas, técnicos da UCGAL informaron á cidadanía sobre os recentes pronunciamentos tanto de tribunais nacionais como europeos, sobre os pasos a seguir para reclamar as cantidades indebidamente pagadas ás entidades bancarias, sobre o procedemento extraxudicial aprobado recentemente polo goberno e sobre a posibilidade de recuperación de cantidades aboadas en concepto de formalización, modificación e cancelación de préstamos hipotecarios.
Ata hoxe, e durante os meses de xaneiro e febreiro, a entidade levou a cabo un enorme esforzo para poder levar información actualizada e veraz ó conxunto da poboación visitando os concellos de Ames (onde realizarou dúas charlas), Culleredo, Arzúa, Cangas, Vigo, Soutomaior, Muxía, A Baña, A Pobra do Caramiñal, Vilagarcía de Arousa, Pontevedra, Ponteareas, Lugo, Vilalba, Taboada, Burela, Viveiro, Allariz, Ourense, Ribadavia, Tui, Riveira, O Valadouro, Catoira e Valga; ofrecendo un total de 26 charlas nas que participaron 1.063 persoas.
Ante o éxito de asistencia a entidade non descarta ofrecer máis charlas nas vindeiras semanas. Mentres, UCGAL segue a traballar despexando as dúbidas das persoas afectadas na súa sede de Santiago de Compostela e nos puntos de asesoramento que ten nos concellos de Ames e Cangas.
https://www.youtube.com/watch?v=rb0wgKRfuj8
