O 2025 está a ser un ano sobresaínte para o Boiro Voleibol. O conxunto encabezado por Adrián Alves firmou un inicio do ano impoluto e tiveron que chegar os dous mellores equipos do grupo A da Superliga 2 para romperlles a burbulla. Seis vitorias de oito posible son o balance que ten o conxunto boirense ata o de agora, cifras que confirman o crecemento dos xogadores, a unión dos xogadores e a madurez sobre o parqué que amosaron en todos os encontros disputados no que vai de ano.
Esta fin de semana o Rotogal volve á carga para pelexar por regresar ao camiño da vitoria logo das últimas dúas derrotas. O VP Madrid visita A Cachada en plena loita pola permanencia polo que non será un rival nada doado para os boirenses.
O Boiro Voleibol chega a esta vixésima xornada no cuarto lugar, empatado a puntos co Dumbría, tras caer a pasada fin de semana na pista do líder, o Textil Santanderina. Os cántabros amosaron a súa superioridade para vencer por 3-0 nun encontro no que os de Alves despregaron un gran xogo e puxeron sobre as cordas ao rival.
Con esas boas sensacións a pesar de derrota reciben mañá ao VP Madrid, penúltimo que ten a salvación a tres puntos, os que o separan do Sporting Soria. Os madrileños chegan con urxencia de puntos á Cachada xa que na pasada xornada caeron por 0-3 ante o CID Jovellanos.
O encontro de ida trae bos recordos aos madrileños xa que someteron ao Rotogal por un traballado 3-2, resultado que os do Barbanza queren mellorar ante a súa afección.
Mañá sábado a partir das 19.00 horas o Boiro Voleibol e o VP Madrid veranse as caras na Cachada onde se medirán por levarse un importante triunfo.
