As oficinas de turismo dos concellos da provincia da Coruña veranse beneficiadas no 2025 cunha liña de axudas de 800.000 euros. Irá destinada a municipios de menos de 50.000 habitantes e servirá para financiar os gastos de persoal. Os beneficiarios recibirán entre 10.000 e 20.000 euros, sempre o cen por cento do importe solicitado.
No caso dos municipios de menos de 10.000 habitantes que non dispoñan de áreas de Turismo nin persoal asignado a esta xestión, ou que non conten con infraestruturas de aloxamentos, pero que conten con espazos, bens ou outros recursos capaces de xerar dinámicas positicas para o turismo, poderán solicitar a subvención mediante a agrupación de polo menos tres concellos limítrofes.
Serán obxecto de subvención neste programa os postos de traballo que estean desempeñados por persoal funcionario ou laboral fixo ou temporal, pero tamén a contratación externa do servizo.
O prazo para presentar solicitudes abranguirá dende o 19 de decembro ata o 16 de xaneiro do 2025.