Xornada perfecta para os equipos da comarca na Terceira RFEF. CF Noia e CD Boiro colleitaron sendas vitorias por 0 a 1 e 3 a 0, respectivamente. Os noieses venceron no campo do Viveiro nun encontro marcado pola tromba de auga. Nun día onde a idea do xogo bonito non era compatible co estado do terreo de xogo, os de Iván Carril apostaron polo xogo directo e adaptarse ás circunstancias.
Non tardaron os xogadores do Noia en sacar a relucir o talento individual. Pasada pouco máis de media hora, Hugo Losada recibía un balón na frontal mandando un potente chut ao fondo da rede. Puideron ampliar a ventaxa, pero a falta de acerto na área rival non llo permitiu.
Con esa vitoria o Noia sitúase sexto con 23 puntos e a só un dos postos de fase de ascenso.
